दस्तावेज तथा स्रोत सामग्री
उज्यालो नेपाल पार्टीका सबै आधिकारिक दस्तावेज र स्रोत सामग्रीहरू
निर्वाचन प्रतिबद्धता पत्र, २०८२
यो निर्वाचन प्रतिबद्धता पत्र उज्यालो नेपाल पार्टीले प्रतिनिधि सभा निर्वाचन २०८२ को लागि तयार पारेको हो। यसमार्फत पार्टीले सुशासन, समृद्धि र सामाजिक न्यायलाई केन्द्रमा राख्दै नागरिकमैत्री सेवा प्रवाह, डिजिटल र पारदर्शी प्रशासन, जवाफदेही नेतृत्व र भ्रष्टाचारविरुद्ध शून्य सहनशीलताको स्पष्ट प्रतिबद्धता जनाएको छ। शासन खर्च घटाउन सांसद तथा मन्त्रालय संख्या कम गर्ने, प्रत्यक्ष निर्वाचित मुख्यमन्त्रीको व्यवस्था, विदेशमा रहेका नेपालीका लागि मतदान सहजता र ‘नो भोट’ विकल्प जस्ता सुधारका प्रस्तावहरू समेटिएका छन्। साथै स्वदेशी पूँजी र लगानी प्रवर्द्धन, जलविद्युत् उत्पादन वृद्धि र निर्यात, कृषि आधुनिकीकरण, पर्यटन प्रवर्द्धन, आईटी र उद्यमशीलता विकासमार्फत रोजगारी सिर्जना गर्ने लक्ष्यसहित शिक्षा र स्वास्थ्यमा निःशुल्क तथा गुणस्तरीय सेवा, युवा स्टार्टअप सहयोग, पूर्वाधार विकास र विपद् जोखिम न्यूनीकरण लगायत कार्यक्रमहरू प्रस्तुत गरिएको छ।
उज्यालो नेपाल पार्टीको निर्वाचन प्रतिवद्धता–पत्र (सारांश)
उज्यालो नेपाल पार्टीको यो प्रतिबद्धता–पत्रको सारसंक्षेपमा सुशासन, समृद्धि र सामाजिक न्यायलाई केन्द्रमा राखी राज्य सञ्चालनलाई चुस्त, किफायती र परिणाममुखी बनाउने कुरा उल्लेख गरिएको छ। यसमा सार्वजनिक सेवा समयमै पाउने अधिकार सुनिश्चित गर्ने, प्रशासनलाई डिजिटल र पारदर्शी बनाउने, सार्वजनिक पद धारण गर्ने व्यक्तिहरूको वार्षिक अनलाइन सम्पत्ति विवरण सार्वजनिक गर्ने, भ्रष्टाचारविरुद्ध शून्य सहनशीलता अपनाई दोषीलाई आजीवन सार्वजनिक पदमा प्रतिबन्ध, गैरकानुनी सम्पत्ति राष्ट्रियकरण र “उज्यालो हटलाइन” सञ्चालन गर्ने व्यवस्था, प्रशासनिक खर्च घटाउन प्रतिनिधिसभा र प्रदेशसभा सदस्य संख्या तथा मन्त्रालय संख्या घटाउने र राज्यमन्त्री तथा सहायकमन्त्री नराख्ने, प्रदेश स्थायित्वका लागि मुख्यमन्त्री प्रत्यक्ष निर्वाचित गर्ने अवधारणा, २०३० सम्म $७० अर्ब र २०३५ सम्म $१११ अर्ब कुल गार्हस्थ्य उत्पादन पुर्याउने, निर्यात विस्तार र वार्षिक ९ देखि १५ लाख रोजगारी सिर्जना गर्ने, २०३० सम्म १२,००० मेगावाट र २०३५ सम्म २५,००० मेगावाट जलविद्युत उत्पादन गरी निर्यातबाट राजस्व बढाउने, कृषिमा डिजिटल पहिचानमार्फत अनुदान, जैविक कृषि विस्तार र सिँचाइका लागि निःशुल्क विद्युत, शिक्षातर्फ तोकिएका संस्थामार्फत विश्वविद्यालय तहसम्म निःशुल्क शिक्षा, स्वास्थ्यतर्फ निःशुल्क उपचार र वडास्तरमा मानसिक स्वास्थ्य सेवा, तथा सरकार गठनपछि हरेक वर्ष कार्यान्वयन प्रगतिको “रिपोर्ट कार्ड” सार्वजनिक गर्ने प्रतिवद्धता समेटिएको छ।
उज्यालो नेपाल पार्टी घोषणापत्र
सुशासन, समृद्धि र सामाजिक न्यायको प्रतिबद्धता
उज्यालो नेपाल पार्टीको यो घोषणापत्रले विगतका राजनीतिक असफलता, भ्रष्टाचार र कुशासनको विकल्पका रूपमा नयाँ राजनीतिक संस्कार, सक्षम नेतृत्व र परिणाममुखी शासन प्रणालीमार्फत सुशासन, समृद्धि र सामाजिक न्याय स्थापना गर्ने दृढ संकल्प प्रस्तुत गर्दछ । जेन जी युवाको ऐतिहासिक आन्दोलनबाट प्रेरित भई स्थापित यो पार्टीले नेपालको संविधानलाई आधार मानी लोकतन्त्र, विधिको शासन, नागरिक स्वतन्त्रता, समावेशिता र राष्ट्रिय हितलाई सर्वोच्च मान्दछ । पार्टीले संघीय संरचनालाई व्यवहारिक र प्रभावकारी बनाउने, निर्वाचन प्रणाली र शासन संरचनामा सुधार गर्ने, पारदर्शी र जवाफदेही राज्य सञ्चालन गर्ने तथा भ्रष्टाचारमाथि कठोर प्रहार गर्ने नीति लिएको छ । आत्मनिर्भर अर्थतन्त्र, स्वदेशी पूँजी परिचालन, ऊर्जा, उद्योग, शिक्षा, स्वास्थ्य र रोजगारीलाई प्राथमिकता दिँदै देशभित्र र विदेशमा रहेका नेपालीको ज्ञान, सीप र लगानीलाई राष्ट्र निर्माणमा जोड्ने लक्ष्य लिइएको छ । सक्षम, इमानदार र प्रतिबद्ध नागरिकको सहभागितामा नयाँ युगको सुरुआत गर्दै उज्यालो भविष्य सहितको उज्यालो नेपाल निर्माण नै यस घोषणापत्रको मूल सार हो ।
उज्यालो नेपाल पार्टी विधान
सुशासन, समृद्धि र सामाजिक न्यायको प्रतिबद्धता
उज्यालो नेपाल पार्टीको विधान २०८२ ले राजनीतिक दल सम्बन्धी ऐन २०७३ को दफा ८(२) र नेपालको संविधान २०७२ को धारा २६९ बमोजिम पार्टीलाई लोकतान्त्रिक, समावेशी, पारदर्शी र व्यवस्थित रूपमा सञ्चालन गर्ने आधार दस्तावेजको रूपमा व्यवस्था गरेको छ । विधानले प्रस्तावनामा नेपालका प्राकृतिक, सांस्कृतिक र ऐतिहासिक विशेषता स्मरण गर्दै विगतका राजनीतिक परिवर्तनपछि पनि जनअपेक्षा अनुरूप स्थिरता, सुशासन, समृद्धि, सामाजिक न्याय हासिल हुन नसकेको यथार्थलाई स्वीकार गरेको छ । यसले जेन–जी आन्दोलनसहित विभिन्न जनसंघर्षको सम्मान गर्दै प्रणालीगत सुधार, नयाँ राजनीतिक संस्कृतिको स्थापना, सुसासन, समृद्धि र सामाजिक न्यायलाई मूल उद्देश्यका रूपमा अघि सारेको छ, साथै प्रविधि, नवप्रवर्तन, उद्यमशीलता, रोजगारी, जलवायु अनुकूलन र विपद उत्थानशील समाज निर्माणलाई प्राथमिकतामा राखेको छ ।
विधानले पार्टीका आधारभूत सिद्धान्तका रूपमा सहभागितामूलक समावेशी लोकतन्त्र, सामुदायिक समाजवाद, बहुसांस्कृतिकतावाद र राष्ट्रिय एकतालाई स्थापित गरेको छ । यसले संविधानको सर्वोच्चता, मानव अधिकार, प्रेस स्वतन्त्रता, भ्रष्टाचारमा शून्य सहनशीलता, योग्यतामा आधारित निष्पक्ष चयन, डिजिटल डेमोक्रेसी, युवामुखी नेतृत्व र सन्तुलित परराष्ट्र नीतिप्रति पार्टीको प्रतिबद्धता स्पष्ट गरेको छ । साथै, विधानले संघीयदेखि वडा तहसम्म पार्टी कार्यालय र संगठनात्मक संयन्त्र, महाधिवेशन र परिषद्, संघीयदेखि वडा कमिटी, अनुशासन, लेखा तथा निर्वाचन आयोग, विज्ञ परिषद् र विषयगत विभागहरू लगायत संरचनागत व्यवस्था निर्धारण गरेको छ । सदस्यताका प्रकार, योग्यता, शुल्क, नवीकरण, अधिकार र कर्तव्य, प्रत्यक्ष निर्वाचन प्रणाली, पदावधि तथा महिला र युवाको न्यूनतम प्रतिनिधित्व जस्ता व्यवस्थामार्फत पार्टी सञ्चालन र निर्णय प्रक्रियालाई चुस्त, दुरुस्त बनाउने प्रयास गरेको छ ।