प्रत्यक्ष र समानुपातिक उम्मेदवारका लागि आवेदन आह्वान

मंसिर १७, २०८२, उज्यालो नेपाल पार्टीले आगामी संघीय र प्रदेशसभा निर्वाचनलाई लक्षित गर्दै प्रतिनिधि सभा र प्रदेश सभाका लागि प्रत्यक्ष तथा समानुपातिक निर्वाचन प्रणालीका उम्मेदवार पहिचान गर्न सर्वसाधारणबाट आवेदन आह्वान गरेको छ । पार्टीले जेन जी आन्दोलनबाट देखिएको ऊर्जा, क्षमतावान युवाशक्ति र व्यवसायिक तथा प्राविधिक ज्ञान भएका नागरिकलाई विधायिकामा पु¥याउँदै आर्थिक रूपान्तरण, सुशासन र सामाजिक न्यायको एजेन्डा अगाडि बढाउने उद्देश्यका साथ उम्मेदवार चयन प्रक्रिया सुरु गरेको छ । पार्टीले सबै निर्वाचन क्षेत्र लक्षित गरी इमानदार, स्वच्छ छवि भएका, आफ्नो क्षेत्रमा सकारात्मक योगदान दिएर पहिचान बनाएका व्यक्तिहरूलाई प्रत्यक्षतर्फ उम्मेदवार बन्ने इच्छुक भए आवेदन दिन आग्रह गरेको छ । समानुपातिक तर्फ महिला, युवा, दलित, आदिवासी–जनजाति, मधेसी, मुस्लिम, अपाङ्गता भएका व्यक्ति, साना व्यवसायी, श्रमिक, कृषि तथा प्रविधि क्षेत्रमा सक्रिय व्यक्तिहरूलाई विशेष प्राथमिकताका साथ आवेदन दिन आग्रह गरिएको छ । उम्मेदवार सिफारिसका लागि पार्टीले तयार पारेको फारम अनलाइन वेभसाइट मार्फत तथा प्रदेश, जिल्ला र स्थानीय तहका पार्टी संरचनाबाट उपलब्ध हुने व्यवस्था मिलाइएको छ । प्राप्त आवेदकहरूको राजनीतिक प्रतिवद्धता, पेशागत योग्यता, स्थानीय तथा राष्ट्रिय बस्तुस्थितीप्रतिको बुझाइ, पार्टीको घोषणापत्र र सिद्धान्तप्रति विश्वास, स्वच्द्ध छबी जस्ता सूचकका आधारमा छनौट गरिने र छनौट भएका सम्भावित उम्मेदवारलाई विशेष अभिमुखीकरण तथा क्षमता विकास कार्यक्रममार्फत तयार पारिने योजना गरिएको छ । पार्टीका तर्फबाट यो प्रक्रियाले जेन जी आन्दोलनले उठाएको परिवर्तनको चाहनालाई संस्थागत गर्न, पुरानै पात्र र प्रवृत्तिमा निर्भर रहने संस्कृतिको अन्त्य गर्दै नयाँ पुस्ता र नयाँ विचारलाई अगाडि ल्याउने लक्ष्य रहेको बताइएको छ । उज्यालो नेपाल पार्टीले राजनीतिलाई इमानदार सेवा, सीप र समाधानमा आधारित पेशागत जिम्मेवारीको रुपमा लिन तयार सबै इच्छुक नागरिकलाई छिटोभन्दा छिटो आवेदन दिन आह्वान गरेको छ ।